Nabalangatan nga Aribai ti 2026 Ilocos Sur Festival ti Mutia ti Narvacan, ni Blsg. Nathalie Clarin. Malaksid iti pannakakoronana a reyna, inyalatna pay ti Best in Evening Gown ken Best in Festival Costume.
Tubo ti Rivadavia, Narvacan, imet ni Nathalie, agtawen iti 20, ti kinapintas, kinasaririt, ken kinaemma ti maysa nga Ilokana. Nakisalsalipen iti napalabas a nakarukodan ti sirib ken kabaelanna, kas iti Miss UNP ken nabalangatan a Miss NSTP 2025 idi laeng Mayo itay napan a tawen, kasta met a nakoronaan a Miss Narvacan idi Disiembre 2025.
Kakaisuna nga anak da Homer Clarin (pimmusayen) ken Fortunata Salva. Maysa nga OFW iti Hong Kong ni nanangna. Adda ita iti sidong ni lolana a Lilia Salva. Nagadal iti Orence Elementary School, iti Narvacan National Central High School, ken iti agdama, addan iti maika-3 a tukad iti College of Nursing iti UNP, Vigan City.
Inawat ni Nathalie ti premio a ₱300,000 manipud iti gobierno probinsial ti Ilocos Sur iti panangidaulo ni Gob. Jeremias Singson.
Dua nga umili ti Santa, Ilocos Sur, naipaayan iti Fr. Jose Burgos Award
Idauluan da Narvacan Mayor Edna Cabalo-Sanidad, DMD, dagiti opisial ti gobierno lokal a nangkablaaw kenkuana.
“Dayaw ti sibubukel a Narvacan ti panangabakna a reyna ti 2026 Ilocos Sur Festival,” kinuna pay ti mayora a nangipaay iti naan-anay a suportana ken ni Nathalie, kaduana ni Atty. Jamyrah Sanidad, a personal a nangimatang iti pannakapilina a kas reyna ti Ilocos Sur a nangparangen iti selebrasion ti maika-208 nga anibersario ti panagbalin ti Ilocos Sur a probinsia. (ELISEO B. CONTILLO)
