Gapu iti in-inut a panagkapuy ti industria ti asukar iti Filipinas, kiniddaw ni Senador Risa Hontiveros iti Senado a marepaso koma dagiti agdama a paglintegan ti pagilian, nangruna ti paglintegan ti Sugar Regulatory Administration (SRA) ken ti Sugar Industry Development Act (SIDA) of 2015.
Impila ni Hontiveros ti Senate Resolution No. 298 idi Pebrero 11 tapno repasuen ti Senado ti agdama a regulasion ti SRA nga addaan pakainaigan iti pribilehio a manggatang ken mangilebben iti lokal a suplay, agraman ti pannakaannurot iti quota ti maangkat iti Estados Unidos.
Kinuna ni Hontiveros nga iti laksid ti pannakaipasa ti SIDA ken ti SRA, bimmaba latta ti kabaelan ti industria ti asukar iti pagilian a makikompetensia kadagiti naglabas a tawtawen gapu iti nababa a produksion iti taltalon, nagastos a produksion, ken saan unay nga epektibo a panaggiling ti asukar.
Segun ken ni Hontiveros, naudin ti Filipinas kadagiti pagilian a mangpatpataud iti asukar kas iti Brazil, Thailand, ken Colombia, idinto a 87 a porsiento laeng ti naipaay ti industria a suplay ti pagilian.
Nadaras a pannakairuar ti ayuda kadagiti naapektaran ti didigra, imbilin ni Marcos
Dinakamat ni Hontiveros a supsuportaran ti industria ti asukar dagiti 700,000 a mangmangged ken pagbiagan ti lima agingga innem a milion a Filipino.
Kinuna ni Hontiveros a nairanta ti SIDA a mangpapigsa koma iti industria ti asukar ken matgedan dagiti mannalon, ngem saan pay a natungpal dagitoy agingga ita. (Hannah L. Torregoza/Manila Bulletin//Lito Hilidon/Bannawag)
