Pinatgan ti sixth division ti Sandiganbayan ti kiddaw dagiti prosecutor ti Ombudsman a maideklarar a kas pugante ni dati a kongresman Zaldy Co, ket inkeddengda a saan a mabalin a makipaset ni Co iti ania man a proseso ti korte agingga a saan a sumuko daytoy.
Insurat ni Sixth Division Chairperson Associate Justice Sarah Jane T. Fernandez ti 16 a panid a resolusion nga inanamongan da Associate Justice Kevin Narce B. Vivero ken Associate Justice Lord A. Villanueva.
Naidarum ni Co iti saan a mapiansaan a malversation of public funds sa naipan ti kaso iti sixth division.
Adda pay kaso ni Co a graft a naipan iti 5th division nga immunan a nangideklarar kenkuana a kas pugante.
Nadaras a pannakairuar ti ayuda kadagiti naapektaran ti didigra, imbilin ni Marcos
Ngem addan iti sabali a pagilian ni Co sipud pay idi Hulio 2025. Nangipila ni Co iti petision iti Korte Suprema (SC) a nangkuestionar iti pannakaidarumna iti Office of the Ombudsman.
Ngem awan pay pangngeddeng ti SC mainaig iti petision ni Co a napirmaan nga adda iti Sweden, segun kadagiti naipablaak a report.
Maibasar iti panggeddeng ti sixth division, ti agtultuloy a panagkedked ni Co a sumuko, wenno mangipalgak iti pudno a yanna a lugar idinto nga ammona nga adda kasona, ti mangipakita a likliklikanna dagiti pannakabagi ti linteg ken ti proseso ti hustisia.
Gapu itoy, kinuna ti sixth division a saan a mabalin a makipaset ni Co kadagiti proseso ti korte, kasta met ti panagkiddawna iti tulong ti korte, ken ti saan a pannakaipaay kadagiti pakaammo ti korte, agingga a saan a sumuko daytoy.
Nupay kasta, napalubosan dagiti abogado ni Co a mangala iti kopia ti dokumento mainaig iti kasona.
Iti sabali a bangir, nangiparang dagiti abogado ni Co iti screenshot dagiti paskil a mangidawdawat iti pannakadangranna, agraman dagiti nairaman iti anomalia iti flood control project, ngem kinuna ti korte a saan a maibilang dagitoy a natalged a pammaneknek nga adda pudno a pangta iti biagna. (Czarina Nicole Ong Ki/Manila Bulletin//Lito Hilidon/Bannawag)
