Natakuatan ti surbey ti Social Weather Stations (SWS) a naipablaak idi Pebrero 12 a 27 a porsiento dagiti nataengan a Filipino ti nagkuna a personal a nakasaksi wenno nakariknada iti nadumaduma a kita ti panangallilaw iti maysa a relasion, idinto a 72 a porsiento ti nagkuna a saanda a nakarikna wenno nakapadas iti kastoy.
Nasaludsod kadagiti respondent ti kastoy: "Nakakita wenno nakariknakayo kadin a mismo iti ania man a kita ti panangallilaw wenno di kinamatalek iti maysa a relasion? No wen, ania a kita ti panangillilaw?"
Napalubosan dagiti respondent a mangted iti adu a sungbat.
Kadagiti nagkuna a nakasaksi wenno nakarikna wenno nakapadas iti pannakaallilaw, 11 a porsiento ti nagkuna a pisikal a panangallilaw, kas iti pannakidenna iti sabali; idinto a 11 a porsiento ti nangdakamat iti panangallilaw iti rikna, kas iti panangisawang iti personal a parikut iti sabali a tao, malaksid iti karelasionda wenno maparparnuay ti romantiko a panagayat iti sabali a tao nupay awan ti pisikal a relasionda.
Melvin Matibag, baro a direktor ti NBI
Innem a porsiento ti nangdakamat iti cybercheating a sabali pay a kita ti panangallilaw, wenno 'tay nalimed a pannakisarita iti sabali a tao babaen ti social media a saan nga ammo ti karelasion; ken 6 a porsiento pay ti nangdakamat iti object cheating wenno 'tay panangipaay iti ad-adu nga atension iti ay-ayam, selpon, wenno dadduma pay a banag ngem iti karelasion.
Panangallilaw a pinansial ti dinakamat ti 5 a porsiento, wenno 'tay panangilimed iti gatangen a "luho" wenno para iti bukbukod a pakausaran wenno utang iti karelasion; idinto nga 4 a porsiento ti nangdakamt iti micro-cheating, wenno ti panangusar iti nalailo a panangawag iti sabali a tao, malaksid iti karelasion, kas iti “baby,” “honey,” wenno “dungngo.”
Naisayangkat ti Fourth Quarter 2025 Social Weather Survey manipud Nobiembre 24 agingga 30, 2025 babaen ti rupanrupa a pananginterbiu kadagiti 1,200 a nataengan iti entero a pagilian, nga addaan iti 300 a respondent iti tunggal lugar ti Metro Manila, Balance Luzon, Visayas, ken Mindanao. (Ellalyn De Vera-Ruiz/Manila Bulletin//Lito Hilidon/Bannawag)
