Inngato ti Department of the Interior and Local Government (DILG) ti maited a gunggona iti asino man a makaipaay iti impormasion a mangitunda iti pannakaarestar ni Charlie “Atong” Ang. Napagbalinen a ₱20 a milion ti gunggona.
Segun ken ni Sekretario ti DILG Jonvic Remulla, inaramidda daytoy tapno maallukoy ti adu a tattao a mangipaay iti impormasion tapno maidatag ni Ang iti korte a nangipaulog iti warrant of arrest kontra kenkuana mainaig kadagiti mapukpukaw a mammallot (sabungeros).
Naglemmeng ni Ang idi napan a bulan kalpasan nga impaulog ti korte iti Laguna ti warrant of arrest kontra kenkuana gapu iti kaso a kidnapping with homicide ken kidnapping with serious illegal detention, nga agpada a di mapiansaan.
Itay kallabes, nairuar ti maikadua a warrant of arrest kontra ken ni Ang manipud iti korte iti Batangas, sa idi Huebes, inruar ti korte ti Laguna ti maikatlo a warrant of arrest kontra kenkuana.
Ombudsman Remulla, paspasungbaten ti Korte Suprema iti petision ni Zaldy Co
Patien ni Remulla nga adda pay leng ni Ang iti pagilian, gapu iti panangideklarar ti gobierno ti Cambodia nga awan ni Ang sadiay.
Impaay ni Police Maj. Gen. Robert Alexander Morico II, direktor ti Criminal Investigation and Detection Group (CIDG), dagiti numero a mabalin nga awagan dagiti makaipaay iti impormasion iti yan ni Ang.
Mabalin nga awagan dagiti numero ti telepono ti PNP-CIDG HOTLINE 0960-692302 ken 0456-115926 a silulukat iti 24 nga oras iti inaldaw. (Aaron Recuenco/Manila Bulletin//Lito Hilidon/Bannawag)
