Naibaon ti kadakkelan nga aircraft carrier iti lubong nga aglayag manipud iti Caribbean Sea, agturong iti Middle East bayat nga ad-adalen ni presidente ti Estados Unidos (US) Donald Trump no pagtignayenna ti militar a maibusor iti Iran, segun iti maysa a tao a makaammo iti plano ti militar.
Ti panaggaraw ti USS Gerald R. Ford, nga immuna nga inreport ti New York Times, ti mangiturong iti dua nga aircraft carrier ken dagiti bunggoyna a bapor a panggubat ti US iti rehion, bayat ti panangpilit ni Trump iti Iran a makitulag iti nuclear program daytoy.
Kiniddaw ti nagsao a tao a saan koma a mainaganan no ibinglayna dagiti panaggaraw ti militar.
Simmanglad iti Middles East ti aircraft carrier nga USS Abraham Lincoln ken dagiti tallo a guided-missile destroyer nasurok a dua a lawasen ti napalabas.
Ayatollah ti Iran, binallaaganna ti US
Binallaagan ni Trump ti Iran idi Huebes, Pebrero 12, nga agbalin a nariribuk ti situasion no awan ti mabukelda a katulagan iti administrasionna.
Naibaon ti USS Ford nga aglayag idi Hunio 2025, ngem saan pay a nalawag no kasano kapaut ti panagtalinaedda iti Middle East, ngem naisagana dagiti kameng ti bapor iti napaut a mision.
Saan pay a nagkomentar ti White House bayat a masursurat daytoy. (The Associated Press/Manila Bulletin//Lito Hilidon/Bannawag)
