Saan nga inanamongan ti International Criminal Court (ICC) ti apelar ni dati a presidente Rodrigo Duterte iti pangngeddeng ti Pre-Trial Chamber I a kabaelan ni Duterte ti sumango iti pannakausig.
Iti pangngeddeng ti PTC 1 idi Pebrero 13, saanda a pinatgan ti “Request for Leave to Appeal” nga impila ti depensa a mangbalusingsing iti immuna a desisionda a kabaelan ni Duterte ti makipaset iti proseso ti ICC.
Inkamang ti depensa ti desision ti PTC-1 iti Appeals Chamber, nga inkalinteganda a maiparbeng ti pannakarepaso ti isyu ti kabaelan ni Duterte a sumango iti pannakausig.
Ngem kinuna ti Appeals Chamber a saanda a natungpal dagiti umisu a pagibasaran para iti interlocutory appeal ken awan ti pagibasaran iti pannakaitantan wenno pannakaisardeng ti confirmation of charges hearing.
Melvin Matibag, baro a direktor ti NBI
Gapu itoy, napatalgedan ti immuna a desision ti PTC 1 a kabaelan ni Duterte ti makipaset iti pre-trial stage, a nangitunda iti pannakaituloy ti confirmation of charges hearing inton Pebrero 23.
Iti sabali a bangir, pinalubosan ti ICC ti 500 pay a nayon a biktima a makipaset iti confirmation of charges hearing, isu nagbalinen a 539 ti dagup a bilang dagiti biktima.
Napusgan da Joel Butuyan ken Gilbert Andres, agraman ni Paolina Massidda ti Office of Public Counsel for Victims, a kas abogado dagiti biktima.
Sakbay daytoy, pinalubosan met ti PTC 1 ti kiddaw ti dagiti abogado ni Duterte a 78 a nayon nga ebidensia, idinto a pinalubosanda ti prosecution nga agnayon iti dua pay nga ebidensia.
Segun kadagiti ukom ti PTC 1, saanda a sinupiat ti kiddaw ti agsinnumbangir a kampo yantangay saan a simmupiat ti Common Legal Representatives of Victims.
Maaramid ti confirmation of charges hearing manipud Pebrero 23 agingga 27, a pangtingitinganda no adda met laeng umdas nga ebidensia tapno patien a pudno nga inaramid ni Duterte dagiti pammabasol kenkuana.(Argyll Cyrus Geducos/Manila Bulletin//Lito Hilidon/Bannawag)
