Nairaman da Senador Ronald dela Rosa, Christopher Lawrence Go, ken dagiti dadduma pay a nalatak a personalidad kadagiti imbilang ti International Criminal Court (ICC) a co-perpetrator ni dati a presidente Rodrigo Duterte iti kaso a crimes against humanity mainaig iti anti-drug war.
Nadakamat ti naganda iti Document Containing Charges nga impila ti Office of the Prosecution idi Pebrero 13.
Malaksid iti dua a senador, nairaman iti listaan dagiti kameng ti “Common Plan” da Vicente Danao (dati a CIDG operations and MPD director), Camilo Cascolan (dati a hepe ti PNP operations), Oscar Albayalde (dati a hepe ti PNP), Dante Gierran (dati a direktor ti NBI), Isidro Lapeña (dati a PDEA chief), ken Vitaliano Aguirre II (dati a sekretario ti DOJ).
Maibasa dagitoy a kaso iti maangay a confirmation of charges hearing inton Pebrero 23. (BANNAWAG NEWS TEAM)
