Inarestar dagiti polis idi Pebrero 14 ti maysa a Koreano nga agtawen iti 61 a wanted iti South Korea gapu iti maipagarup a panangallilaw iti pinansial, iti operasion dagiti polis a naisayangkat iti Puerto Galera,Oriental Mindoro.
Segun ken ni Police Brig. Gen. Jovencio S. Badua, Jr., direktor ti Mimaropa regional police, adda arrest warrant a naipaulog kontra ken ni Hae Jung Chun manipud iti Changwon District Court ken iti Seoul Central District Court, Republic of Korea, gapu iti maipagarup a panaglabsing iti Foreign Exchange Transactions Act ken iti Electronic Financial Transactions Act.
Kuna ni Badua nga adda metten rimmuar a Red Notice manipud iti Interpol mainaig kadagitoy a kaso, ken naarestar ni Hae gapu iti Warrant of Deportation manipud iti Bureau of Immigration.
Addan ni Hae iti sidong ti Fugitive Search Unit ti Bureau of Immigration. (Aaron Recuenco/Manila Bulletin//Lito Hilidon/Bannawag)
