Impaulog ti Land Transportation Franchising and Regulatory Board (LTFRB) ti 116 a show cause order (SCO) ken notice of violation (NOV) tapno kitaenda dagiti naperdin a terminal ti bus ken public utility vehicle (PUV).
Segun ken ni daulo ti LTFRB Vigor D. Mendoza II, ti nadakamat a 116 a terminal ket paset ti 243 a pasilidad a tiningitingda iti entero a pagilian, tapno maguyugoy dagiti mangimatmaton ken operator ti terminal nga agtungpal iti pagalagadan ti gobierno tapno maikkan ti naan-anay a serbisio dagiti pasahero.
Maibasar iti datos ti LTFRB, ti Metro Manila ti kaaduan ti natingitingda a terminal nga addaan iti 40, sumaruno ti Central Luzon ken Northern Mindanao (sag-30 a terminal), ken iti Calabarzon (27 a terminal).
Sumagmamano kadagiti nalabsing ti di umdas a pasilidad a paglinongan dagiti agur-uray a pasahero, naperdi a kasilias, nailet nga espasio a saan a makaipaay iti nam-ay ken talged dagiti pasahero. Agkurang met dagiti dadduma a terminal iti seguridad ken komportable a pagurayan dagiti senior citizen ken PWD.
Melvin Matibag, baro a direktor ti NBI
Inkari ni Mendoza nga paikkatna ti kadawyan a kapanunotan dagiti mangimatmaton ken operator ti terminal a di mangikankano iti pagimbagan dagiti pasaheroda.
Innayon ni Mendoza a saanda bumdeng a mangipaserra kadagiti terminal a saan a makatungpal iti pagannurotan a mangipaayda iti kangrunaan a pasilidad tapno nanam-ay ken natalged dagiti pasaheroda. (Aaron Recuenco/Manila Bulletin//Lito Hilidon/Bannawag)
