Ginasut a napessaan a pawikan ti naibulos iti baybay ti San Pedro, Narvacan idi Pebrero 9, 2026 iti panangidaulo da Mayor Edna Cabalo-Sanidad, DMD, ken Bise Mayor Margarito Tejada.
Iti pannakaibulos dagiti annak ti pawikan, manamnama nga umadu ti sea turtle kadagiti baybay ti Narvacan, kas kinuna dagiti agindeg iti Barangay San Pedro. Maipalagip a ginasgasuten a pawikan ti napapessaan iti Brgy. San Pedro ken Brgy. Pantoc a naibulos iti West Philippine Sea.
Iti Nobiembre ken Disiembre, gagangay a makita dagiti mangngalap dagiti dadakkel a pawikan a bumangkag tapno agitlogda iti kadaratan nga igid ti baybay. Gagangay nga agpessa dagitoy iti Enero ken Pebrero, nga isunto metten ti pannakaibulosda iti baybay.
Napagnunumuan dagiti opisial ti lokalidad, iti pannakitinnulong ti DENR, ken dagiti opisial ti barangay, a masaluadan dagiti agitlog a pawikan agingga iti makapagpessada. Nainget ti pannakaiparit ti pannakakalap dagiti pawikan kasta met iti pannakaala dagiti itlog dagitoy ta maibilangdan nga endangered species. Iti pannakasaluad dagiti sea turtles iti Narvacan, nabuniagan ti lokalidad a kas “Pawikan Sanctuary.”
Ni Robredo ti napigsa a kasalisal ni VP Duterte --Rep. Erice
Kadua da Mayora Sanidad a nangibulos kadagiti hatchlings iti baybay da Municipal Administrator Atty. Jamyrah Sanidad, SBM Mark Jun Tejada, MPDO Elmer Advincula, MLGOO Mildred Villaruz, MDRRMO Alvin Cunanan, dagiti opisial ti Brgy. San Pedro nga idauluan ni Brgy. Capt. Ernie Molina, ken sinaksian dagiti umili. (ELISEO B. CONTILLO
