Inlungalong ni Senador Loren Legarda ita nga aldaw, Pebrero 18, ti pannakawaswas ti treasure hunting law ken pannakaikkat ti agdama a permit system tapno mapabileg ti panangsalaknib iti kultural ken arkeolohikal a tawid.
Impila ni Legarda ti Senate Bill (SB) No. 1860 a mangwaswas iti Presidential Decree No. 1726-A, a nangipaay iti pagalagadan iti panagsapul ti gameng ken tapno mawaswas dagiti probision a mangipalubos iti panagsapul iti gameng segun iti Republic Act No. 10066 wenno ti National Cultural Heritage Act of 2009 NCHA.
Ti agdama a linteg, a naipaulog pay idi panawen ti Martial Law ken namagtalinaed iti NCHA, ti nangipalubos iti panagkali ken pannakapukaw dagiti nailemmeng a gameng, a pagnumaran laeng dagiti pribado a tattao, imbes nga iti sientipiko a panagsukimat ken interes ti publiko.
Segun ken ni Legarda, no ti linteg a mangsalaknib koma kadagiti tawid ti Filipino ket nangitunda iti pannakaibus daytoy, rumbeng laeng a mawaswas ti linteg.
Kiddaw ni Duterte a saan a dumar-ay iti confirmation hearing, sinupiat ti ICC prosecutor
Maibasar iti SB No. 1860, ti National Commission for Culture and the Arts (NCCA) ti mapusgan a mangbukel iti komprehensibo a paglintegan ken alagaden a mangituray kadagiti amin nga arkeolohikal a panagkali, iti man uneg ti daga wenno danum.
Kuna ni Legarda a maitunos daytoy a linteg kadagiti kasayaatan nga aramid iti panangsalalknib iti tawid, agraman dagiti panagkumit ti pagilian iti sidong ti UNESCO convention a mangikalikagum kadagiti partido ti estado a mangsalaknib kadagiti kultural a lugar manipud iti komersial a pananggundaway. (Wilnard Bacelonia/PNA//Lito Hilidon/Bannawag)
