Inwaragawag ni Bise Presidente Sara Duterte ita nga aldaw, Pebrero 18, ti tarigagayna nga agngayangay a para presidente iti eleksion inton 2028, nga inkarina a no mapagasatan, ipangpangrunana ti interes ken pagsayaatan dagiti Filipino iti baet ti nasaknap a panagkunniber iti pagilian.
Nupay adda met sangsanguen ni Duterte a kaso ti impeachment gapu iti saan a mailawlawag a confidential fund, kinunana a "para iti Dios, iti pagilian, ken kadagiti Filipino" ti panagngayangayna a kas presidente.
Iti panagbitlana, dimmawat ni Duterte iti pammakawan kadagiti Filipino gapu iti panangtulongna ken ni Presidente Marcos idi, ken gapu iti pannakailumlom latta dagiti Filipino iti parikut ti panagkunniber ken panangabuso dagiti institusion gapu iti personal nga interes.
Dimmawat ni Duterte iti pammakawan kadagiti Filipino gapu kadagiti impatakder ti gobierno a rangtay ken kalsada a nalaka a maperdi; kadagiti krimen, illegal a droga, ken terorista nga aramid; ken ti saan a nalawag a foreign policy. (Joseph Pedrajas/Manila Bulletin//Lito Hilidon/Bannawag)
