Tallo a tattao ti kinemmeg ti National Bureau of Investigation-Ilocos Regional Office (NBI-IRO) idinto a naisalakan ti maysa a 16-anios a balasitang manipud iti maysa a bar a mapapati a pakaar-aramidan ti sex trafficking iti Barangay San Francisco, San Fernando City iti La Union, idi Pebrero 10.
Inlinged ti NBI ti nagan dagiti natiliw ken ti naisalakan a menor de edad.
Madagdagus a naipilaan iti darum dagiti suspek gapu iti panaglabsingda iti Republic Act No. 9208, Anti-Trafficking in Persons Act of 2002 as amended.
Melvin Matibag, baro a direktor ti NBI
Segun iti NBI, imbilin ti korte a maidetinar dagiti tallo a suspek iti San Fernando City Jail.
Naipasidong metten ti naisalakan a balasitang iti panangaywan ti City Social Welfare and Development office (CSWD) ti San Fernando City.
“Naisayangkat ti operasion babaen ti referral manipud iti CSWD a nakairamanan ti dua a menor de edad a biktima manipud Bukidnon a nakalibas iti lokal a bar,” kinuna ti NBI.
Segun iti imbestigasion ti NBI, naammuan a dagiti biktima ket narekrut nga agtrabaho iti maysa a restawran iti Manila ngem naipanda iti La Union ken napilitda nga agtrabaho kas bar girls.
Kinuna ti NBI a “ginundawayan dagiti suspek ti bulnerabilidad dagiti biktima ket mapapati a pinilitda dagiti biktima a makiseks kadagiti kustomer nga agbayad iti ₱1,500 a ‘bar fine.’"
Kalpasan a nakompirmar ti NBI nga adda pay sabali a menor de edad nga adda iti nasao a bar, nangisayangkat a dagus dagiti ahenteda iti entrapment and rescue operation a nangitunda iti pannakatiliw dagiti tallo a suspek ken pannakaisalakan ti biktima. (Jeffrey Damicog/MB)
