Impatalged ni Presidente Marcos Jr. ti akem ti Japan kas estratehiko a kadua iti panangidur-as iti negosio, panagpuonan, ken dekalidad nga impraestruktura, bayat ti pannakipatangna kadagiti negosiante ti Filipinas ken Japan iti Malakanyang idi Pebrero 18.
Pinasangbay ni Presidente Marcos dagiti delegado ti Japan-Philippines Economic Cooperation Committee (JPECC) ken ti Philippines-Japan Economic Cooperation Committee, Inc. (PHILJEC) bayat ti panag-courtesy call-da kasanguanan ti maaramid a 2nd Annual Joint Meeting iti Manila.
Iti panagbitla ni Marcos, kinunana a ti kaadda dagiti Hapon ti mangipakita iti natibker ken napaut a panagkadua iti ekonomia ti Filipinas ken Japan ken ti pananganamongda iti panagdur-as ken kinatalged iti rehion.
Ti Japan latta ti kapatgan a kaasmang ti Filipinas, nangruna iti negosio, panagpuonan, ken dekalidad nga impraestruktura, ken iti pannakaitandudo ti naandur a suplay, panagdur-as, ken naun-uneg a pannakiraman iti ekonomia iti rehion.
Melvin Matibag, baro a direktor ti NBI
Iti maangay a 42nd Joint Meeting, tamingen ti PHILJEC ken JPECC dagiti dadakkel a parikut a mangapektar iti panagtinnulong iti ekonomia ken idur-asda dagiti praktikal a wagas tapno ad-adda a mapapigsa ti negosio, panagpuonan, impraestruktura, panagrang-ay ti tao, ken turismo. (Argyll Cyrus Geducos/Manila//Lito Hilidon/Bannawag)
