Urayen pay ti Department of Justice (DOJ) ti pangngeddeng ti Korte Suprema (SC) sakbay nga aksionanda dagiti warrant of arrest a mabalin nga iruar ti International Criminal Court (ICC) kontra kadagiti makunkuna a co-perpetrator ni dati a presidente Rodrigo Duterte iti pammapatay maipuon iti illegal a droga.
Daytoy ti kinuna ni panakangiwat ti DOJ Raphael Niccolo L. Martinez idi Pebrero 18, kalpasan nga inruar ti ICC ti 16 a panid a Document Containing the Charges (DCC) a nangibutaktak iti nagan dagiti walo a maatap a co-perpetrator ti dati a presidente.
Nadakamat iti DCC ti nagan da Sen. Ronald "Bato" Dela Rosa a dati a hepe ti Philippine National Police (PNP); Sen. Christopher Lawrence “Bong” Go; dati a National Capital Region Police Office (NCRPO) regional director Vicente Danao; dati a NCRPO regional director Camilo Cascolan; dati a hepe ti PNP Oscar Albayalde; dati a National Bureau of Investigation (NBI) director Dante Gierran; dati a hepe ti Philippine Drug Enforcement Agency Isidro Lapeña; ken dati a DOJ secretary Vitaliano Aguirre II.
Naarestar ni Duterte idi Marso 11, 2025 ngem dimmatag da Duterte ken Dela Rosa iti SC ket kinuestionarda ti pannakayawat ni Duterte iti ICC.
Melvin Matibag, baro a direktor ti NBI
Nangipila met dagiti annak ni Duterte iti kiddaw a writ of habeas corpus a nangkarit iti pannakaarestar ti amada.
Saan pay a narisut ti SC daytoy a banag agingga ita.
Gapu itoy, kinuna ni Martinez a nasaysayaat nga urayen ti DOJ ti resolusion ti SC sakbay nga agtignayda mainaig iti ania man a warant of arrest a mairuar.
Innayon ni Martinez nga ania man a tignay a maipatungpal kadagiti walo a dinakamat ti ICC, ket desision ti ehekutibo.
Inlawlawag ni Martinez nga adda ngamin dagiti linteg a maipakat iti daytoy a kaso, ket dinakamatna ti Republic Act (RA) 9851, the Philippine Act on Crimes Against International Humanitarian Law, Genocide, and Other Crimes Against Humanity.
Maibasar iti daytoy a linteg, dua ti wagas ti mabalin a pakaalaan ti international court wenno tribunal iti hurisdiksion iti tao nga adda iti pagilian: extradition wenno panangisuko.
Innayon ni Martinez a no nangiruar ti InterPol iti Red Notice wenno dimmawat iti tulong a mangipatungpal iti warrant of arrest ti ICC, rumbeng laeng nga agtungpal ti gobierno ti Filipinas ta kameng ti Filipinas ti InterPol. (Jeffrey Damicog/Manila Bulletin//Lito Hilidon/Bannawag)
