Isayangkat ti Land Transportation Franchising and Regulatory Board (LTFRB) ti maysa a public consultation inton Pebrero 20 tapno pagsasaritaanda dagiti amin a parikut iti operasion dagiti terminal ti bus ken dadduma pay a public utility vehicle (PUV).
Segun ken ni LTFRB chairman Vigor D. Mendoza II, pagsasaritaanda ti mainaig kadagiti rekititos ken accreditation dagiti terminal ti lugan, ken panagbibinninglay kadagiti kasayaatan a wagas a mabalin a tuladen dagiti dadduma a terminal ti lugan.
Kinuna ni Mendoza a kasapulan unay a makapatangna dagiti operator ken mangimatmaton kadagiti terminal, nangruna ta agbalinton a regular ti kellaat a pananginspeksionda kadagiti terminal ti bus ken dadduma pay a PUV.
Innayon ni Mendoza a nangipatuloddan iti imbitasion kadagiti maseknan a partido tapno mapagsasaritaanda no kasano a matungpalda dagiti pagannurotan ken mapasayaat ti operasion dagiti terminal ti lugan iti entero a pagilian. (Aaron Recuenco/Manila Bulletin//Lito Hilidon/Bannawag)
