Linagip ni Manila 6th district Rep. Bienvenido "Benny" Abante Jr. ti pangngeddeng nga impaulog ti Senado agarup 15 a tawenen ti napalabas, bayat ti umadani a pannakairugi ti proseso ti impeachment a maibusor ken ni Bise Presidente Sara Duterte.
Ni Abante ti maysa kadagiti nangyendorso iti maikapat nga impeachment complaint a naipila kontra ken ni Duterte, ket dinakamatna ti kaso daydi dati a Supreme Court (SC) chief justice Renato Corona a kas pammaneknek a dagiti mekanismo iti panangdusa kadagiti nagbasol ket nagbatay iti panangtungpal iti rekititos ti Konstitusion, kas iti saan a napudno a pannakaaramid ti statement of assets, liabilities and net worth (SALN) ti maysa nga agpapaay iti gobierno.
Kaduana ni Deputy Speaker La Union 1st district Rep. Paolo Ortega V a nangyendorso iti maikapat nga impeachment complaint.
Segun ken ni Abante, maysa laeng ti nakakombiktar ken ni Corona: ti saanna a panangideklarar iti SALN-na.
Gunglo dagiti pasurot ni dati a presidente Duterte, mangangay iti motorcade inton Marso 11
Iti daytoy a tawen, addan uppat a beripikado ken nayendorso nga impeachment complaint kontra ken ni Duterte.
Kuna ni Abante a nairaman iti maikapat nga impeachment complaint kontra ken ni Duterte ti alegasion a "failure to truthfully and fully declare assets, liabilities and net worth."
Patien ni Abante a nupay politikal ti kababalin ti impeachment, agbatay latta daytoy iti ebidensia mainaig iti articles of impeachment.
Impaganetget ni Abante a saan a rumbeng nga ibilang ti proseso ti impeachment a kas politikal a panangmaniobra, ket masapul a tingitingen a naimbag dagiti kameng ti Kamara ken Senado dagiti naidatag nga ebidensia. (Ellson Quismorio/Manila Bulletin//Lito Hilidon/Bannawag)
