Sinupiat ti Office of the Prosecutor ti International Criminal Court (ICC) ti kiddaw ni dati a presidente Rodrigo Duterte a mangiwaksi iti kalinteganna a personal a dumar-ay iti confirmation of charges hearing a mangrugi inton Pebrero 23.
Iti dokumento nga impila ti prosecution, kiniddawda iti Pre-Trial Chamber I (PTC 1) a mailaksid koma ti kiddaw ni Duterte, ta awan ti umdas a legal a pagbatayan tapno saan nga agparang iti korte.
Imbatad ti prosecution a ti PTC 1 laeng -- saan a ti akusado -- ti mangikeddeng no adda legal a pagbatayan ti saan a pannakipaset ni Duterte iti confirmation hearing.
Dinakamat ti prosecution ti panangtingiting dagiti agwaywayas a medical expert a nagkuna a kabaelan ni Duterte ti sumango iti proseso ti pre-trial.
Ni Robredo ti napigsa a kasalisal ni VP Duterte --Rep. Erice
Inlawlawag ti prosecution a kasapulan ti personal nga idadar-ay tapno masigurado ti integridad ken kinasin-aw ti proseso, nangruna ta nadagsen ti kaso ken para iti interes dagiti biktima.
Segun iti prosecution, saan a mabalin a pagpambar ni Duterte ti saanna a panangbigbig iti hurisdiksion kenkuana ti ICC, ken ti kunana a panangkidnap kenkuana ti ICC, iti kiddawna a saan a makipaset iti confirmation hearing.
Innayon ti prosecution a ti panangpalubos ken ni Duterte a saan a makipaset iti hearing nga awan ti nadagsen a makagapu ket saan a maitunos iti paglintegan ti Rome Statute mainaig iti proseso ti confirmation of charges. (Argyll Cyrus Geducos/Manila Bulletin//Lito Hilidon/Bannawag)
