Saan a pinatgan ti Pre-Trial Chamber I (PTC 1) ti International Criminal Court (ICC) ti kiddaw dagiti abogado ni dati a presidente Rodrigo Duterte a mangdiskualipikar iti external legal representative wenno abogado dagiti biktima ti drug war, kasanguanan ti umadani a confirmation of charges hearing.
Maibasar iti pangngeddeng ti PTC 1 idi Pebrero 20, kunada nga awan ti legal a pagbatayan ti kiddaw ti depensa a maikkat da abogado Joel Butuyan ken Gilbert Andres kas mangibagi kadagiti biktima a makipaset iti confirmation hearing.
Inkalintegan ti depensa nga adda makatubeng iti panangibagida ken "conflict of interest" kadagiti kameng ti legal team dagiti biktima.
Ngem inkeddeng dagiti hues a ti probision a dinakamat ti depensa kas iti Article 12 ti ICC Code of Professional Conduct, ket mayaplikar laeng kadagiti abogado, saan a kadagiti saan nga abogado a kameng ti legal a grupo, kas kadagiti case manager.
Marcos, Robredo, nagsarak iti Naga city
Innayon ti PTC 1 a saan a napaneknekan ti Depensa ti ibagbagada a "conflict of interest" ken maysa laeng daytoy a pattapatta.
Kaipapananna nga agtalinaed da Butuyan ken Andres a kas common legal representative dagiti 539 a biktima a napalubosan a makipaset iti confirmation hearing. (Argyll Cyrus Geducos/Manila Bulletin//Lito Hilidon/Bannawag)
