Impakdaar ti Stratbase Institute ti yaadu ti pannakibiang dagiti ganggannaet babaen ti panangiwarasda iti palso nga impormasion a mangsukog iti panirigan ti publiko ken demokratiko a proseso.
Ti Stratbase Institute (SI) ket maysa a grupo nga agsuksukisok iti depensa ken seguridad.
Segun ken ni SI President Victor Andres “Dindo” Manhit, maibilang daytoy a parikut a "saan a makita a pannakidangadang" iti beddeng ti internet a maysa a pangta itan iti demokrasia ken iti demokratiko a proseso iti pagilian bayat a narugianen a pagsasaritaan ti mainaig iti eleksion iti pagilian.
"Saanen a mausar dagiti bala, bapor, wenno eroplano (itoy a dangadang). Ti pangrukodan iti pagbabakalan ket no asino ti makakontrol iti impormasion iti tangatang, asino ti mangbukel iti naratibo a maipatpatangatang, ken asino ti makaimpluensia iti panirigan ti publiko," kinuna ni Manhit iti pannakayusuat ti taripnong a Navigating Digital Crossroads: Advancing Cybersecurity and Democratic Resilience in the Indo-Pacific" a naangay iti Manila Polo Club.
Marcos, Robredo, nagsarak iti Naga city
Impaganetget ni Manhit a narugianen dagiti sayangkat a panangimpluensia mainaig iti eleksion sakbay pay a mangrugi ti panagkakampania.
Iti cybersecurity conference a nagpaut iti dua nga aldaw, nagpapatangan dagiti opisial ti depensa ken seguridad dagiti kumarkaro a pangta iti internet, hybrid warfare, panagespia iti internet, ken foreign information manipulation and interference (FIMI) a pakairamanan ti panangiwaras iti palso a damag mainaig iti eleksion.
Impaganetget ni Manhit a naigagara, organisado, ken nakarkaro itan ti pannakibiang dagiti ganggannaet, ket namakdaar a no awan ti napaut a panagplano, agbalin a saan a sisasagana ti Filipinas a mangsaranget kadagiti agbalbaliw a geopolitikal a pangta iti sumaruno a dekada. (Aaron Recuenco/Manila Bulletin//Lito Hilidon/Bannawag)
