Awan ti nadakamat a plano para iti 2028 iti panangsarungkar ni Presidente Marcos Jr. iti Siudad ti Naga a nagsarakanda ken city Mayor Leni Robredo ita nga aldaw, Pebrero 21.

Iti pannakipatang ni Marcos kadagiti kameng ti media kalpasan ti pananginspeksionna iti operasion iti Oplan Kontra Baha iti Sagop Creek iti Barangay Triangulo, kinuna ni Marcos nga awan ti nagsaritaanda ken ni Robredo maipanggep iti politika.

"Serbisio pay nga umuna, sakbay ti politika," kinuna ti presidente.

Inyangaw ni Marcos a ti napolitikaan laeng nga inaramidna ita nga aldaw ket ti panangaruatna iti "derosas a medias," kas panangraem kadagiti Robredo.

Nasional

Kumarkaro a panagraira ti palso nga impormasion, imballaag ti maysa a grupo

Ti derosas ti politikal a maris ni Robredo idi nagngayangay a presidente idi 2022, ngem inatiw ni Marcos.

Kinuna ni Marcos a nabayagen a naikeddeng ti panangsarungkarna iti Naga City, sakbay pay nga indeklarar ni Bise Presidente Sara Duterte ti panggepna inton 2028.

Patien dagiti political analyst a ni Robredo ti kapigsaan a mabalin a mangatiw ken ni Duterte inton 2028, ket ti posible a panangyendorso kenkuana ni Marcos ti ad-adda a mangpapigsa iti kandidatura ni Robredo.

Nupay kasta, impaganetget ni Marcos a nasapa pay tapno pagsasaritaanda ti mainaig iti politika. (Ruth Abbey Gita-Carlos/PNA//Lito Hilidon/Bannawag)