Naidumduma ti maikapat nga impeachment complaint a naipila kontra ken ni Bise Presidente Sara Duterte gapu ta kayat daytoy a tamingen ti tinawen nga statement of assets, liabilities and net worth (SALN) ti bise presidente.
Agatiddog iti 64 a panid ti verified complaint, nga indatag ni Nathaniel Cabrera ken inyendorso da La Union 1st district Rep. Paolo Ortega V ken Manila 6th district Rep. Bienvenido "Benny" Abante Jr.
Segun iti dokumento, masapul a ma-impeach ni VP Duterte gapu iti saan a napudno a linaon ti SALN ken saan a mailawlawag a kinabaknang ti bise presidente.
Kiniddaw ni Cabrera iti Kamara a mangipaulogda iti subpoena para iti bank record a naglaon kadagiti deposito, withdrawal, transfer, ken account activity manipud 2019 agingga 2025, ken makikoordinarda kadagiti ahensia kas iti Commission on Audit (CO), Bureau of Internal Revenue (BIR), ken Anti-Money Laundering Council (AMLC).
Marcos, Robredo, nagsarak iti Naga city
Insingasing ni Cabrera iti Kamara a mangalada iti agwaywayas a grupo ti forensic accounting tapno maidasigda ti SALN ken rekord ni VP Duterte iti banko.
Pormal a naipila ti reklamo ni Cabrera iti opisina ti Secretary General ti Kamara idi Pebrero 18, sa nayawat iti opisina ni Speaker Faustino "Bojie" Dy III iti sumaruno nga aldaw. (Ellson Quismorio/Manila Bulletin//Lito Hilidon/Bannawag)
