Opisial a rinugianen ti Pre-Trial Chamber I (PTC 1) International Criminal Court (ICC) ti confirmation of charges hearing kontra ken ni dati a presidente Rodrigo Duterte, idi rabii ti Pebrero 23 (oras ti Filipinas).
Iti panagbitla ni Deputy Prosecutor ti ICC Mame Mandiaye Niang, imbatadna nga adda umdas a pammaneknek a mangituldo ken ni Duterte a nangaramid kadagiti kaso a nakaidarumanna, a naaramid idi nagpaay a mayor ti Davao City ken idi nagbalin a presidente.
Segun ken ni Niang, dagiti 78 a kaso ti pammapatay (murder) ken gandat a panangpapatay (attempted murder) ket paset laeng ti rinibu a bilang ti pammapatay a nasaknap ken nairanta kadagiti sibilian nga umili ti Filipinas.
Imparang ni ICC Senior Trial Lawyer Julian Nicholls ti napateg nga akem ni Duterte iti grupo a Davao Death Squad (DDS) a ti misionda ket mangpapatay kadagiti kriminal ken maatap a kriminal, agraman dagiti maatap nga agus-usar ken aglaklako iti droga.
Segun ken ni Nicholls, adu a testigo ti nangpatalged a kasapulan dagiti kameng ti DDS ti pammalubos ni Duterte sakbay nga iwayatda ti pammapatay.
Panagngato ti plete iti dyip, kdp. a PUV, inanamongan ti LTFRB
Dinakamat ni Nicholls dagiti lima a co-perpetrator (kakaduana a nangisayangkat) ni Duterte idi nagpaay a mayor ti Davao City nga isu da Senador Ronald dela Rosa, dati a hepe ti Davao City Police Office; Senador Bong Go, katulongan (aide) ni Duterte; dati a Justice Secretary Vitaliano Aguirre II; Vicente Danao, dati a hepe ti Davao City police; ken ni dati a National Bureau of Investigation director Dante Gierran.
Iti biang dagiti biktima nga imbagian ni abogado Joel Butuyan, impeksada ti pannakaupayda gapu iti panangipalubos ti korte a saan a makipaset ni Duterte iti confimation hearing.
Segun ken ni Butuyan, agsagsagaba latta dagiti biktima iti pammutbuteng ken pannakariribuk.
Innayon ni Butuyan a no saan a makompirmar dagiti kaso ni Duterte iti ICC, agsubli ni Duterte iti Filipinas a kas maysa a "bannuar" ket agtultuloy ti panangiwarasna iti damag ti saanna a pannakadusa.
"Panunotenyo ti nakaro a pangta a lak-amen dagiti biktima no mawayawayaan ti suspek," kinuna ni Butuyan. (Argyll Cyrus Geducos/Manila Bulletin//Lito Hilidon/Bannawag)
