Dinagadag ti Department of Social Welfare and Development (DSWD) dagiti ahensia ti gobierno, civil society organization, ken amin a maseknan a mangted iti komento mainaig iti singasing nga implementing rules and regulations (IRR) para iti Republic Act 12309 wenno ti Free Funeral Service Act (FFSA), bayat ti panangsaganada a mangyimplementar iti linteg.
Segun ken ni panakangiwat ti DSWD Assistant Secretary Irene Dumlao ita nga aldaw, Pebrero 25, kayatdan nga ipatungpal ti FFSA tapno maep-ep ti panagdanag dagiti umili nga agsagrap iti pannakapukaw ti kameng ti pamilia, isu a kayatdan a malpas ti IRR.
Kinuna ni Dumlao a mabalin a mangipaay iti komento ti asino man nga interesado , tapno maaddaan ti DSWD iti nadumaduma a panirigan iti panangiringpasda iti IRR.
Maibasar iti RA 12309, maikkan iti libre a serbisio ti puneraria ti asino man a pamilia nga addaan iti krisis, kas inkeddeng ti DSWD, agraman dagiti marigrigat a pamilia wenno dagiti pamilia a naapektaran ti kalamidad wenno didigra.
Segun iti singasing nga IRR, ti DSWD ti mangiwardas iti pannakaipatungpal ti linteg, idinto a tumulong ti Department of Trade and Industry (DTI) kas ahensia a mangtaming iti pannakairehistro dagiti negosio ken panangsalaknib iti konsumer; ti Department of the Interior and Local Government (DILG) a mangiwardas kadagiti local government units (LGU); ken ti Department of Health (DOH) a mangiwardas iti salun-at ken kinadalus.
Panagngato ti plete iti dyip, kdp. a PUV, inanamongan ti LTFRB
Mabalin nga ipatulod dagiti komento iti [email protected] ken maikkan ti kopia ti Department Legislative Liaison Office ti DSWD babaen ti [email protected], sa ikabil kas Subject ti: Comments on Draft IRR of RA 12309 (Free Funeral Service Act) agingga inton Marso 6, 2026. (PNA//Lito Hilidon/Bannawag)
