Nasaknap ken sistematiko ti naisayangkat a drug war iti Filipinas iti sidong ti panangidaulo ni dati a presidente Rodrigo R. Duterte, a nangpuntiria kadagiti marigrigat.
Daytoy ti imbatad da Paolina Massidda, abogado ti agwaywayas nga Office of Public Counsel for Victims (OPCV), ken Gilbert Andres, deputy director ti Center for International Law Philippines, iti maikadua nga aldaw ti confirmation of charges hearing a naangay iti International Criminal Court (ICC) iti The Hague, The Netherlands idi Pebrero 24.
Imbinsabinsa ni Massidda iti Pre-Trial Chamber I (PTC 1) ti ICC ti saan a pannakadusa ni Duterte iti panangisayangkatna iti war on drugs manipud nagpaay a mayor ti Davao City agingga iti panagakemna a kas presidente ti Filipinas.
Dinakamat ni Massidda dagiti naar-aramid a panangraut iti rabii, panangserrek nga awan ti warrant, dagiti biktima a napaltogan iti asideg, dagiti agpapada a post-incident report ti polis, agpapada a sarita ti armado a panagkedked, "limmaban," nalimed a pannakaikabil dagiti droga ken armas, ken ti kaawan ti napaypayso nga imbestigasion -- ti mangipakita iti sistematiko a panangraut.
Segun ken ni Massidda, saan a nairana laeng dagitoy a pammapatay no di ket, naipakadawyan.
Apidabit ti tunggal maysa iti 18 nga ex-marines, kiniddaw ti Ombudsman
Kuna ni Massidda a ni Duterte ti nangidaulo kadagiti naranggas a panangparmek a panangipakaammona iti publiko a dagiti responsable ket “saanda nga agbuteng iti panagsungbat."
Kinuna pay ni Massidda nga awan ti ebidensia iti ania man nga inaramid ni Duterte tapno malapdan wenno madusa dagiti responsable iti pammapatay.
Iti sabali a bangir, impaganetget ni Andres a ti insayangkat ni Duterte a war on drugs ket saan a panangpugipog iti droga no di ket panangpugipog kadagiti marigrigat.
Maituloy ti confirmation of charges hearing inton Pebrero 26. (Rocky Nazareno/Manila Bulletin//Lito Hilidon/Bannawag)
