Naidatag iti Office of the Ombudsman (OMB) ita nga aldaw, Pebrero 26, ti notariado nga apidabit dagiti 18 a dati a kameng ti Marines a nagkuna a nangitulodda iti kuarta nga aggatad iti ₱805 a bilion a kickback manipud iti flood control project iti pagtaengan da Presidente Marcos Jr. ken dati a House speaker Martin Romualdez, ken dadduma pay nga opisial ti gobierno.
Segun ken ni Levi Baligod, abogado dagiti 18 a dati a Marines, inkeddeng dagiti klientena nga idatag dagiti apidabitda iti OMB, ta isu laeng ti sanga ti gobierno a mabalin a mangimbestigar kadagiti opisial ti gobierno a nairaman iti irregularidad.
Kinuna ni Baligod nga indatagda ti apidabit iti Ombudsman tapno laeng maaddaan iti prima facie evidence nga adda nakaaramid iti maikaniwas.
Bayat a nasursurat daytoy, awan pay ti maala a kopia ti apidabit .
Namnamaen ni Baligod a dagiti tao a dinakamatda ket maidarum iti panaglabsing iti Republic Act No. 3019, the Anti-Graft and Corrupt Practices Act, ken RA No. 6713, ti Code of Conduct and Ethical Standards for Public Officials and Employees.
Adda umdas a pangibatayan tapno makompirmar ti kaso ni Duterte --ICC prosecution
No agimbestigar pay ti Ombudsman, kinuna ni Baligod a mabalin pay a maidarum iti malversation of public funds ken bribery dagiti tao a dinakamatda iti apidabit .
Segun kadagiti dati a Marines, nangitulodda iti kuarta a naikabil iti maleta manipud 2022 agingga 2025 kadagiti nadumaduma nga opisial ti gobierno kas imbilin ni dati a kongresman Elizaldy "Zaldy" Co.
Malaksid kada Marcos ken Romualdez, nadakamat met ti nagan da Senate President Vicente "Tito" Sotto III, Sen. Francis Escudero, Sen. Mark Villar, Sen. Erwin Tulfo, Sen. Loren Legarda, Sen. Jinggoy Estrada, Sen. Joel Villanueva, Sen. Christopher "Bong" Go, dati a senador Ramon "Bong" Revilla Jr., dati a senador Antonio "Sonny" Trillanes IV, National Security Adviser Eduardo Ano, ken dadduma pay a mammanday-linteg. (Czarina Nicole Ong Ki/Manila Bulletin//Lito Hilidon/Bannawag)
