Rinugianen ni Senate President Pro Tempore Panfilo “Ping” Lacson, daulo ti Blue Ribbon Committee ti Senado, a tingitingen ti maipagarup a modus a nakairamanan dagiti dati a militar a nangitulod iti dakkel a gatad kadagiti nangato nga opisial, kas imbilin kadakuada ni dati a kongresman Elizaldy “Zaldy" Co.
Kinuna ni Lacson, nga immunan a nagsukimat sakbay pay a maipila ti resolusion a mangkiddaw iti Blue Ribbon Committee nga agimbestigar, a dua a banag ti masapul a tingitingen.
Kalpasan daytoy ti panangipila ni Sen. Imee Marcos iti Senate Resolution No. 317 idi Pebrero 25, a nangkiddaw iti pannakaimbestigar iti maipagarup a panangitulod dagiti dati a kameng ti militar iti binilion ti gatadna a kuarta.
Dinakamat ti resolusion ni Sen. Marcos ti press conference dagiti 18 a dati a kameng ti Marines a naangay idi Pebrero 24, a kunada a nangitulodda iti binilion a kuarta iti pagtaengan da Presidente Ferdinand Marcos Jr. ken dati a House Speaker Martin Romualdez ken dadduma pay nga opisial ti gobierno ken personalidad.
Ni abogado a Levito Baligod ti nangiparang kadagiti 18 a dati a militar ket inramanna pay ni dati a senador Antonio Trillanes IV a mapapati a nangpondo iti hotel accommodation ken dadduma pay a ginasto dagiti imbestigador ti International Criminal Court (ICC) bayat ti kaaddada iti Filipinas.
Saan a salip iti social media ti proseso ti impeachment --Rep. Luistro
Segun ken ni Lacson, adalenda pay ti nagtaudan ti impormasion ken ti kinapudno ken kredibilidad ti impormasion a linaon ti affidavit dagiti 18 a dati a kameng ti Philippine Marines.
Kuna ni Lacson a sinuratannan ti Philippine Navy ken ti Philippine Army tapno kitaenda ti rekord ken imbestigarenda ti kababalin dagiti 18 a dati a Marines, ket rimmuar ti report nga adu kadagitoy ti dishonorably discharged idinto a saan a kameng ti Marines wenno Philippine Navy dagiti uppat.
"Para kaniak, saan laeng a politika ti panggep ti naangay a press conference no di ket panangrippuog iti gobierno," kinuna ni Lacson. (Hannah L. Torregoza/Manila Bulletin//Lito Hilidon/Bannawag)
