Dandani mapukawen ni Senador Ronald dela Rosa amin a komite a nagkamenganna gapu iti agtultuloy a kaawanna iti Senado.
Daytoy ti imbatad ni Senate President Vicente 'Tito' Sotto III kadagiti kameng ti media idi Pebrero 25.
Maibasar iti paglintegan ti Senado, ti lima nga agsasaruno a di mailawlawag a panaglangan ti senador ti mangkikkat kenkuana iti komite a pagkamenganna.
Itay nabiit, inmosion ni Senate Majority Leader Juan Miguel "Migz" Zubiri a sukatan ni minority Senator Joel Villanueva ni Dela Rosa kas kameng ti Senate Committee on Justice and Human Rights.
Idi napan a lawas, ni Senador Robinhood Padilla ti simmukat ken ni Dela Rosa a kas kameng ti Senate Committee on Accountability of Public Officers and Investigations, wenno ti Blue Ribbon Committee.
Proseso ti kaso nga impeachment ni VP Duterte, saan nga apektaran ti kaso ni Madriaga
Da met senador Imee Marcos ken Rodante Marcoleta ti simmukat ken ni Dela Rosa a kas kameng ti Senate Committee on Ethics and Privileges.
Segun ken ni Sotto, masapul a pagbobotosanda dagiti sumukat iti natda pay a komite a pagkamengan ni Dela Rosa, nupay agtalinaed latta daytoy a kameng dagiti komite a saan pay a nagtataripnong.
Saanen a nagparparang ni Dela Rosa iti Senado sipud idi impakaammo ni Ombudsman Jesus Crispin Remulla nga addan warrant of arrest ti senador nga impaulog ti International Criminal Court (ICC) idi Nobiembre 2025.
Nairaman ni Dela Rosa a kas co-perpetrator iti drug war ni dati a presidente Rodrigo Duterte. (Dhel Nazario/Manila Bulletin//Lito Hilidon/Bannawag)
