Gapu iti yaadu dagiti agusar ti Artificial Intelligence (AI) iti uneg ti klase iti Filipinas -- a tumulong kadagiti estudiante a mangbukel iti salaysay, mangtsek iti grammar, ken agpanunot iti idea, nangisaad ti Department of Education (DepEd) iti pagpatinggaan iti panagusar dagiti estudiante iti daytoy a teknolohia: mabalin a tumulong ti AI iti panagsursuro dagiti estudiante, ngem saan a rumbeng a sukatan daytoy ti panunot ti tao.
Babaen ti Department Order No. 003, series of 2026, impaulog ni DepEd Secretary Sonny Angara dagiti pagalagadan iti panagusar iti AI iti kangrunaan nga edukasion -- tapno maan-anay ti pannakausar ti teknolohia ken masalakniban dagiti adalan, mannursuro, ken ti integridad ti edukasion.
Iti 49 a panid a direktiba, binigbig ni Angara ti nasaknap ken gagangayen a panagusar iti AI kadagiti estudiante ken mannursuro, ngem adda met pagdaksan dagitoy.
Impakdaar ti DepEd a no awan ti pagalagadan iti panagusar iti AI, mabalin a maikulbo dagiti adalan iti pannakakompromiso ti pribado a datos, palso nga impormasion, ken saan nga agpapada nga aramid kadagiti pagadalan.
Segun iti DepEd, agtalinaed a ti mannursuro ken adalan ti adda iti sentro ti edukasion, ket katulongan laeng ti AI.
Singasing nga Anti-Political Dynasty Law, pimmasa iti komite ti Kamara
Innayon ti DepEd a nupay makatulong ti AI iti panagaramid iti lesson plan, quiz, wenno manganalisar iti datos, agtalinaed a kapatgan ti panangtingiting ti tao, nangnangruna iti panangtingiting iti nagapuanan dagiti estudiante.
Impaganetget ni Angara a saan a rumbeng a suktan ti AI ti napateg nga annongen ti mannursuro.
Maibasar iti pagalagadan, masapul nga ibaga dagiti estudiante no nagusarda iti AI kadagiti inaramidda nga assignment -- manipud iti panangparnuay iti idea agingga iti panang-edit ken panagsukisok -- tapno agtalinaed ti napudno, responsable ken panagpanunotda iti panawen a nalaka laengen ti agsapul iti sungbat.
Kinuna ti DepEd a dagiti napeggad a panagusar iti AI kas iti panangited iti grado, panangawat iti estudiante, pangngeddeng kadagiti scholarship, agraman panangdisiplina kadagiti ubbing -- ket kasapulan unay ti panangtingiting ti tao.
Impaganetget ti DepEd a masapul a ti AI ti tumulong kadagiti estudiante a mangparnuay iti kangrunaan a laingda kas iti panaganalisar, komunikasion, panagpartuat, ken panangrisut iti parikut, ket saan ketdi a mangpakapuy iti kabaelan ti tao. (Merlina Hernando-Malipot/Manila Bulletin//Lito Hilidon/Bannawag)
