Kinemmeg ti National Bureau of Investigation (NBI) ti maysa a kameng ti grupo ti terorista a suspek iti pannakabomba ti General Santos City idi 2018, a simmangpet iti Filipinas idi Pebrero 2 , kalpasan nga impadeportar ti Estados Unidos (US).
Segun iti National Bureau of Investigation (NBI), naited ti warrant of arrest nga impaulog ti General Santos City regional trial court (RTC) a maibusor iti maatap a kameng ti grupo ti terorista a Dawlah Islamiyah-Maguid apaman a simmangpet daytoy iti Ninoy Aquino International Airport (NAIA).
Tinulongan ti Philippine National Police-Criminal Investigation and Detection Group (PNP-CIDG) ti NBI a nangiserbi iti arrest warrant iti suspek, a saan a nainaganan.
Kinuna ti NBI a timmakias ti suspek iti Estados Unidos tapno liklikanna ti kasona.
Impatuldo dagiti autoridad a ti Dawlah Islamiya-Maguid Group ti akin-aramid iti 2018 General Santos City bombing a nakatayan ti walo a sibilian, agraman ti tallo ti tawenna nga ubing.
Adda umdas a pangibatayan tapno makompirmar ti kaso ni Duterte --ICC prosecution
Maibasar kadagiti intelligence report, ti nakemmeg a suspek ti kangrunaan a nagakem iti panagplano ken pannakaipatungpal iti panangusarda iti improvised explosive device (IED). (Jeffrey Damicog/Manila Bulletin//Lito Hilidon/Bannawag)
