Sisasagana ti gobierno a mangimbestigar iti maipagarup a pammapatay mainaig iti droga iti sidong ti administrasion ni Presidente Marcos no adda maiparang a natibker nga ebidensia.
Daytoy ti kinuna ni undersecretary ti Presidential Communications Office (PCO) Claire Castro ita nga aldaw, Pebrero 27, kalpasan nga imbatad ni Nicholas Kaufman, abogado ni dati a presidente Rodrigo Duterte iti International Criminal Court (ICC), nga agtultuloy latta dagiti pammapatay mainaig iti droga bayat ti panagturay ni Marcos.
Segun ken ni Castro, nangiparang koma ni Kaufman iti natibker nga ebidensia, a saan nga agpatingga laeng iti bilang, tapno maisayangkatda ti imbestigasion.
Innayon ni Castro a saan a kayat ni Presidente Marcos a mamulitan ti administrasionna iti alegasion ti extrajudicial killings (EJK), ta saan a daytoy ti kayatna nga ibati a pakalaglagipan kenkuana.
Kinuna ni Castro a dagiti addaan iti kastoy nga alegasion ket masapul a dumatag iti Philippine National Police (PNP), iti Criminal Investigation and Detection Group (CIDG), wenno iti National Bureau of Investigation (NBI).
Adda umdas a pangibatayan tapno makompirmar ti kaso ni Duterte --ICC prosecution
Iti sabali a bangir, binabalaw ni Castro ti panangdakamat ni Kaufman iti presidente, imbes a depensaanna ti klientena a ni Duterte.
Dinillaw met ni Castro ti argumento ti kampo ni Duterte a ti sao a “neutralize” ket dina kaipapanan ti pammapatay. Kinuna ni Castro nga iti konteksto ti Filipinas, nangruna iti beddeng ti pannakabagi ti linteg ken militar, panangpapatay ti kaipapanan ti “neutralize.”
Inlawlawag ni Castro a saan a kayat ni Presidente Marcos nga agayus ti dara wenno adda EJK iti kampania kontra iti illegal a droga, no di ket maipakat ti due process ken panangannurot iti Konstitusion. (Argyll Cyrus Geducos/Manila Bulletin//Lito Hilidon/Bannawag)
