Patien ni Iloilo 3rd district Rep. Lorenz Defensor a ti impangta idi ni Bise Presidente Sara Duterte a mangpapatay ken ni Presidente Marcos Jr. ket mabalin a pagbatayan ti impeachment complaint.
Kinuna daytoy ni House senior deputy majority leader Defensor kasanguanan ti panangtaming ti Committee on Justice iti uppat nga impeachment complaint kontra ken ni Duterte inton Marso 2.
Segun ken ni Defensor, ti sinao idi ni Duterte nga addan kinasaritana a tao a mangpapatay ken ni Presidente Marcos, iti ania man a tawen, ket maibilang nga impeachable offense.
Innayon ni Defensor a natibker ti ebidensiada idi damo a na-impeach ni Duterte idi 2025, a nadakamat ti panagpangta ni Duterte nga ipapatayna da Presidente Marcos, First Lady Liza Araneta-Marcos, ken dati a House Speaker Martin Romualdez, aglalo ta kinuna ni Duterte a saan nga agang-angaw.
Innayon ni Defensor a no adda baro nga ebidensia a maidatag dagiti nangipila iti impeachment complaint, papigsaen daytoy ti ebidensia a maibusor ken ni Duterte.
Adda umdas a pangibatayan tapno makompirmar ti kaso ni Duterte --ICC prosecution
Ni Defensor ti maysa a kameng ti prosecution team para iti saan a natuloy a kaso nga impeachment ni Duterte. (Ellson Quismorio/Manila Bulletin//Lito Hilidon/Bannawag)
