Imbatad ti Office of the Prosecutor (OTP) ti International Criminal Court (ICC) nga agwaywayas ti prosekusion ken ti panagimbestigarda idinto nga aggapu iti naaprobaran a badiet ti ICC ti pondoda, iti baet ti timpuar nga alegasion iti Filipinas nga immawatda iti pasuksok.
Iti statement nga inruar ti OTP idi Pebrero 26 kalpasan a rimmuar ti alegasion nga immawat dagiti tao ti ICC iti pasuksok mainaig iti kaso ni dati a presidente Rodrigo Duterte, impaganetgetda nga agwaywayas ti panagkalapda iti impormasion mainaig iti panagimbestigarda ken kitaenda no asino ti testigo a mabalin a pangalaanda iti testimonia.
Kuna ti OTP nga ad-adalenda ti kredibilidad, kinamapagtalkan, ken kinapateg ti amin nga impormasion a maalada ken agpada a tingitingenda dagiti makadadael ken mangabsuelto nga ebidensia.
Segun iti OTP, ti panangipalgak iti impormasion kadagiti kaso nga iggem ti ICC ket nainget a tartarawidwidan ti paglintegan ti ICC ken agtalinaed daytoy iti sidong ti panangiwardas dagiti agwaywayas a hues ti ICC.
Innayon ti OTP a dagiti nagtaudan ti ebidensia, agraman nagnagan dagiti empleado ken testigo wenno gunglo a kauman ti OTP iti naisayangkat nga imbestigasion ket maibilang a kompidensial a banag tapno masalakniban ti seguridad ken kinatalged dagitoy. (Argyll Cyrus Geducos/Manila Bulletin//Lito Hilidon/Bannawag)
