Kinuestionar ti abogado ni dati a presidente Rodrigo Duterte ti panagpannuray ti prosekusion kadagiti tattao a nangipudno iti bagida a mammapatay nga agbalin a kangrunaan a testigo a maibusor ken ni Duterte mainaig iti kasona a crimes against humanity, idinto nga awan ti kredibilidad ti testimonia dagitoy.
Segun ken ni Nicholas Kaufman iti maikatlo nga aldaw ti confirmation of charges hearing a naangay iti International Criminal Court (ICC) idi Pebrero 26, mapagduaduaan ti testimonia dagiti mammapatay a maipagarup a nangipatungpal iti "common plan" ni Duterte ken dagiti co-perpetrators wenno kakaduana a nagisayangkat, nga agi-neutralize -- wenno kas kuna ti prosekusion, agpapatay -- kadagiti drug suspect ta "limitado laeng ti pannakausar" dagitoy.
Innayon ni Kaufman a nupay mabalin a mausar a maibusor kadakuada ti bukodda a testimonia, masapul latta a matingiting ti kredibilidad ti tunggal maysa kadakuada.
Iti panangidatag ni Kaufman iti argumentona, inlawlawagna a ti panang-neutralize iti suspek ket dina kaipapanan a panangpapatay iti suspek.
Dinakamat ni Kaufman dagiti dokumento kas iti police manuals ken judicial documents a ti kaipapanan ti i-neutralize ket nainkalintegan a panangtengngel, ket iti biang ni dati a hepe ti Philippine National Police (PNP) Ronald Dela Rosa, panangarestar ti kaipapanan daytoy.
Adda umdas a pangibatayan tapno makompirmar ti kaso ni Duterte --ICC prosecution
Binabalaw ni Kaufman ti panagpaay dagiti mammapatay a kas kangrunaan a testigo ti prosekusion, ta kaaduan kadagiti testimoniada ket innala dagiti imbestigador ti prosekusion nga addaan iti pammatalged a limitado ti pannakausar dagitoy, nga ania man a paset ti testimoniada a makadadael kadakuada ket saan a mabalin nga usaren a maibusor kadakuada iti ICC. (Joseph Pedrajas/Manila Bulletin//Lito Hilidon/Bannawag)
