Inkalintegan ti prosekusion ti International Criminal Court (ICC) nga adda umdas a pagbatayan tapno makompirmar ti kaso ni dati a presidente Rodrigo Duterte a mangitunda iti full trial.
Iti closing statement ni Julian Nicholls iti maudi nga aldaw ti confirmation of charges hearing a naangay idi Pebrero 27, dinakamatna dagiti imparang ni Nicholas Kaufman, abogado ni Duterte, iti naglabas a dua nga aldaw ti makagapu no apay a rumbeng a maituloy iti full trial ti kaso.
Segun ken ni Nicholls, dagiti indatag ni Kaufman kadagiti naglabas a dua nga aldaw a nangdakamat kadagiti imbagbaga dagiti testigo mainaig kadagiti pasamak ket masukimat iti full trial.
Innayon ni Nicholls nga umdasen dagiti testigo a mangpaneknek iti kasoda ken mangitunda iti pannakakompirmar ti kaso.
Sinupiat ni Nicholls ti argumento ti depensa a ti sao a “neutralization” iti kampania kontra droga ket kaipapananna ti panangparmek laeng iti suspek, ngem kunana nga adda ebidensia a "panangpapatay" ti kaipapanan daytoy.
Filipino iti Israel, napakdaaran nga agridam
Ti confirmation of charges hearing ket saan pay a full trial, no di ket panangtingiting ti Pre Trial Chamber (PTC) ti ICC no adda met laeng umdas nga ebidensia a mangipakita a naaramid ni Duterte dagiti kaso a nakaidarumanna.
Maikkan iti 60 nga aldaw ti PTC tapno mangted iti pangngeddeng no kompirmarenda met laeng dagiti kaso ni Duterte wenno saan. (Joyce Ann L. Rocamora/PNA//Lito Hilidon/Bannawag)
