Mabalakadan dagiti Filipino iti Israel a paliiwenda dagiti mapaspasamak iti baet ti sabali pay a posible a panagsusupiat iti Middle East gapu iti panangipasimudaag ni Presidente ti Estados Unidos (US) Donald Trump a mangraut iti Iran.
Impaulog ti Embahada ti Filipinas iti Tel Aviv ti pakdaar ita a bigat, Pebrero 28, bayat a binilin ti US dagiti non-essential embassy personnel a pumanawda iti Israel gapu iti pangta iti seguridad.
Segun iti Embahada ti Filipinas, bambantayanda dagiti mapaspasamak ket indagadagda kadagiti Filipino a surotenda ti pakdaar ti Home Front Command ti Israel Defense Forces (IDF) mainaig iti ania man a panagbaliw iti pagaladagan para iti kinatalged.
Itay Biernes, impasimudaag ni Trump ti posibilidad a rautenda ti Iran ta saanna a nagustuan ti nuclear program nga isaysayangkat ti Tehran.
Agsagsaganan ti Israel, a kaaliado ti US, iti posible a panagibales ti Iran. (Joseph Pedrajas/Manila Bulletin//Lito Hilidon/Bannawag)
