Napapatay ti kangatuan a daulo ti Iran a ni Ayatollah Ali Khamenei, 86, bayat ti panangraut dagiti puersa ti Israel ken Estados Unidos (US), kas kinompirmar ti media nga iggem ti Iran idi Pebrero 28, a nangdadael iti masakbayan ti Islamic Republic ken iti kinatalged ti rehion.
Nasapsapa nga inwaragawag ni US President Donald Trump ti ipapatay ti daulo ti Iran, ket kunana nga addan gundaway dagiti umili ti Iran a mangisubli iti pagilianda.
Inwaragawag ti media ti Iran a napapatay ni Ali Khamenei iti naiwayat nga airstrike a nangpuntiria iti pagtaenganna iti Siudad ti Tehran. Naipakita iti ladawan nga ala ti satellite ti nakaro a pannakabomba ti lugar.
Iti paskil ni Trump iti social media, kinunana a natayen ni Khamenei, a kadaksan a tao iti historia, ken innayonna nga agtultuloy ti panangrautda iti Iran iti las-ud ti lawas, kas paset ti tignay ti US tapno maisardeng ti nuklear nga armas ti Iran.
Segun ken ni Trump, saan a naliklikan ni Khamenei ti Intelligence and Highly Sophisticated Tracking Systems ti US ken babaen ti pannakitinnulong ti Israel, awan ti maaramidan da Khamenei ken dagiti kakaduana a nairaman a natay.
Kadakkelan nga aircraft carrier ti US, naibaon iti Middle East
Gapu iti pannakatay ni Khamenei, napataud ti kaawan ti mangidaulo iti Iran idinto nga awan ti nalatak nga agbalin a suno daytoy.
Segun kadagiti nakaimatang iti Tehran, nagraragsak ken nagiikkis dagiti residente apaman a rimmuar ti report ti ipapatay ni Khamenei.
Kinompirmar ti Human Rights Activists News Agency a nasurok a 7,000 ti tao a nairaman a natay ken adu pay ti im-imbestigarenda idinto nga inaklon ti gobierno ti Iran a nasuroken a 3,000 ti natay.
Iti sabali a bangir, binabalaw dagiti Democrat ti inaramid ni Trump gapu ta nagtignay daytoy nga awan pammalubos ti Kongreso, ngem kuna ni panakangiwat ti White House Karoline Leavitt a nasakbay a napakaammuan ti sumagmamano a daulo ti Republican ken Democrat ti Kongreso maipanggep itoy a banag. (The Associated Press/Manila Bulletin//Lito Hilidon//Bannawag)
