Inlawlawag da Akbayan Party-list Party-list Rep. Perci Cendaña ken Mamamayang Liberal (ML) Party-list Rep. Leila de Lima ita nga aldaw, Marso 2, a saan a tanda ti panagsanudda ti pannakaibabawi iti maikadua nga impeachment compaint a maibusor ken ni Bise Presidente Sara Duterte.
Iti maysa nga interbiu, impaganetget ni Cendaña a saanda a nagsanud, no di ket panangsigurado a napigsa ken maipan ti kaso nga impeachment iti Senado iti kabiitan a panawen.
Idi Domingo, Marso 1, inwaragawag ti grupo a Tindig Pilipinas nga ibabawidan ti impeachment complaint nga impilada kontra ken ni Duterte, ta kapada daytoy ti maysa pay nga impeachment complaint a naipilan, ket impeksada ti panangruportarda iti maikatlo nga impeachment complaint a nangdakamat iti isu met laeng nga alegasion ken umdas nga ebidensia kas iti impilada.
Da Cendaña ken De Lima ti nangyendorso iti nasao nga impeachment complaint, idinto a nagpaay a kas complainant ti daulo ti Tindig Pilipinas a ni Francis Aquino Dee.
Segun ken ni De Lima, awan met ti parikut iti daytoy, ta tumulong daytoy iti komite a mapapardas ken mapagtitipon dagiti kaso nga impeachment, kangrunaan iti panangidatag iti ebidensia, idinto a 60 nga aldaw laeng ti naipaay iti komite a mangtaming iti impeachment complaint.
Saan a salip iti social media ti proseso ti impeachment --Rep. Luistro
Inlawlawag ni De Lima nga awanen ti tiempo ti Committee on Justice ti Kamara a mangtaming iti adu nga impeachment complaint, ket masapul a mayallatiw ti impeachment complaint iti Senado sakbay nga ag-adjourn sine die ti Kongreso.
Innayon ni De Lima a makipaset latta ti grupo a Tindig Pilipinas iti pannakabista ti kaso, no kasapulan, ket saanda a maawan iti proseso. (Ellson Quismorio/Manila Bulletin//Lito Hilidon/Bannawag)
