Indeklarar ti Committee on Justice ti Kamara ita nga aldaw, Marso 4, a "sufficient in substance" dagiti dua nga impeachment complaint kontra ken ni Bise Presidente Sara Duterte, a nangitunda iti naan-anay a pannakasukimat dagiti ebidensia iti nadakamat a nagbasolanna.
Pimmasa ti impeachment complaint nga impila da Father Joel Saballa (Saballa complaint) a nangdakamat iti innem a grounds for impeachment; ken ti impila ni Nathaniel Cabrera (Cabrera complaint) a nangdakamat iti pito a grounds for impeachment.
Immuna a naideklarar a sufficient in substance ti Saballa complaint babaen ti botos a 54-1-0 (wen-saan-abstain), kasta met ti Cabrera complaint iti isu met la a resulta.
Ni laeng Quezon City 4th district Rep. Jesus "Bong" Suntay ti saan nga immanamong iti pannakataming dagiti dua nga impeachment complaint.
Ni Chairperson Batangas 2nd district Rep. Gerville Luistro ti nangidaulo iti panagsasarita ti komite.
Panagwaras ti fake news iti pannakabista ti kaso nga impeachment ni Duterte, impakdaar ni Rep. Adiong
Maibasar iti House Rules ti 19th Congress, nga inadaptar ti 20th Congress, partikular ti Rule II ti Rules of Procedure in Impeachment Proceedings, apaman a maideklarar a sufficient in substance ti impeachment complaint, ikkan ti Committee on Justice ti respondent (Sara Duterte) iti kopia ti impeachment complaint.
Maikkan ti respondent iti gundaway a sumungbat iti las-ud ti 10 nga aldaw (calendar days) kalpasan a maawatna ti pakaammo ti komite, ken mabalin met a sumungbat dagiti nagreklamo.
Kalpasanna, mangangay ti komite iti hearing ken idatagda ti reportda iti Kamara iti las-ud ti 60 session days. (Ellson Quismorio/Manila Bulletin/Manila Bulletin//Lito Hilidon/Bannawag)
