Impila ni Bise Presidente Sara Duterte ita nga aldaw, Marso 4, ti kaso a perjury kontra ken ni Ramil Madriaga iti Office of the City Prosecutor ti Taguig, a kinuyog ni abogadona a Salvador Panelo.
Ni Madriaga, a nagpaam-ammo a kas dati nga aide ni Duterte, ti nagkuna a binaon ni Duterte a nangitulod iti dakkel a gatad ti kuarta kadagiti nadumaduma a tattao.
Ni Madriaga ti maysa kadagiti testigo iti impeachment complaint ni VP Duterte.
"Saan a mabalin a baybay-an lattan a mausar ti parbo a sarita a pangallilaw iti publiko," kinuna ni Duterte.
Dinakamat ni Duterte ti maipagarup a panagpannuray ti International Criminal Court (ICC) iti pinartuat nga istoria ti testigo nga imparang ni dati a senador Sonny Trillanes, agraman da Arturo Lascañas ken Edgar Matobato.
Panagwaras ti fake news iti pannakabista ti kaso nga impeachment ni Duterte, impakdaar ni Rep. Adiong
Segun ken ni Duterte, no idi pay la koma a naidarum ida iti perjury, saan koma a mausar ti testimoniada kontra ken ni dati a presidente Rodrigo Duterte iti ICC.
Kinuna ni Duterte nga adda kaso ni Madriaga a kidnapping a nagpammarang a kas campaign supporter sa kellaat a nagparang a testigo iti impeachment complaint kontra kenkuana. (Joseph Pedrajas/Manila Bulletin//Lito Hilidon/Bannawag)
