Tinagibassit ni Quezon City 4th district Rep. Jesus "Bong" Suntay ti pangta ni Bise Presidente Sara Duterte ken ni Presidente Marcos idi 2024, iti naangay a panangbista ti Committee on Justice idi Marso iti kaso nga impeachment kontra iti bise presidente.
Binabalaw daytoy ni Negros Oriental 3rd district Rep. Janice Degamo, nga agladladingit pay laeng agingga ita gapu iti pannakapapatay ti asawana a gobernador, tallo a tawenen ti napalabas.
Iti maysa a video a naipabuya idi Nobiembre 2024, kinuna ni VP Duterte nga addan naalana a mangpapatay kada Presidente Marcos Jr., First Lady Liza Araneta-Marcos, ken ni dati a House Speaker Leyte 1st district Rep. Martin Romualdez, no bilang adda mangpapatay kenkuana.
Segun ken ni Suntay, saan a maibilang a serioso a pangta daytoy, ta no serioso ti maysa a tao a mangpapatay, saanna nga iwaragawag daytoy iti sangalubongan.
Ngem simmungbat ni Degamo ket kinunana a maibasar iti padasna, adu ti naawatda a pangta sakbay a napapatay ti asawana.
Proseso ti kaso nga impeachment ni VP Duterte, saan nga apektaran ti kaso ni Madriaga
"Idi damo, adda kondision dagiti pangta, a no aramidem daytoy ket kastoy ti mapasamak. Ngem uray no kondisional laeng dagidiay a pangta, adda latta buteng ken panagamak a parnuayen daytoy. Mabalin latta a pumayso ti kondisional a pangta," kinuna ni Degamo.
Inyarig ni Degamo dagiti naawatda a ballaag iti sinao ni Duterte -- ti maikadua a kangatuan nga opisial ti pagilian -- a maibusor iti agassawa a Marcos ken Romualdez.
Segun ken ni Degamo, dagiti kakastoy a deklarasion ti maysa nga opisial ti pagilian ket pamutbuteng kadagiti dadduma nga opisial, mangimpluensia iti desision, ken mangdadael iti panagtalek ti publiko.
Innayon ni Degamo a mabalin a bassit ti epekto ti kastoy a pangta no gagangay a tao laeng ti mangipangta, ngem no aggapu iti nangato nga opisial ti gobierno ti pangta, adu ti mabalin a maaramid.
Iti sabali a bangir, dinillaw met ni Manila 6th district Rep. Bienvenido Abante Jr. ti kasla panangyab-abogado ni Suntay ken ni Duterte.
Segun ken ni Abante, nabuyada met ti video ni Duterte ket nalawag ti pangtana iti presidente, iti first lady, ken iti speaker, ket maysa daytoy a "red flag" iti kinatalged ti pagilian.
Innayon ni Abante a saan a pribado nga umili ni Duterte, ta ti Office of the Vice President (OVP) ket addaan ti access, impluensia, ken rekursos para iti seguridad, isu a ti pagalagadan iti panagtalek ti publiko ket masapul a maipangato, saan a maipababa. (Ellson Quismorio/Manila Bulletin//Lito Hilidon/Bannawag)
