Isagsagana itan ti Land Transportation Franchising and Regulatory Board (LTFRB) dagiti amin a kasapulan a dokumento para iti pannakaipaay iti fuel subsidy iti baet ti posibilidad ngumato ti presio ti produkto a petroleo gapu iti gubat iti Middle East.
Kinuna ni LTFRB chairman Vigor D. Mendoza II a makikoordinarda kadagiti maseknan nga ahensia ti gobierno kas iti Landbank ken dadduma pay a maseknan a partido, nangruna dagiti transport operator, para iti napardas ken naannayas a pannakaiwaras ti tulong ti gobierno apaman a makadanon iti $80 kada bariles ti presio ti lana iti sangalubongan a merkado.
Segun ken ni Mendoza, ar-aramidenda daytoy kas mayannurot iti bilin ni Department of Transportation Secretary Giovanni Lopez nga isaganada dagiti mabalin a benepisiario iti kabiitan a panawen, kasanguanan ti maekspektar nga ingingina ti presio ti lana.
Segun kadagiti eksperto, ti panangraut iti Middle East, a buyogen ti panangserra iti Hormuz Strait a kangrunaan a ruta dagiti agibibiahe iti lana ti sangalubongan, ti mabalin a mangsinga iti panagtagilako iti lana a mangitunda iti ingingina daytoy.
Ita pay laeng, addan ti pattapatta a mabalin a ngumato ti presio ti krudo iti ₱9 kada litro ken agarup ₱4 kada litro met ti gasolina inton umay a lawas.
Proseso ti kaso nga impeachment ni VP Duterte, saan nga apektaran ti kaso ni Madriaga
Kuna ni Medoza a makikoordinardan iti LandBank no kasano a mapadaras ti pannakaited iti pondo ti fuel subsidy apaman a mairuaren daytoy.
Nupay kasta, saan pay a masungbatan ti LTFRB no anamonganda ti panagngato iti pasahe a kidkiddawen dagiti grupo ti transportasion. (Aaron Recuenco/Manila Bulletin//Lito Hilidon/Bannawag)
