Suportaran dagiti senador ti singasing a maikkan ni Presidente Marcos Jr. iti autoridad a mangkissay wenno mangsuspenso iti fuel excise tax iti baet ti posible a panagngina ti lana (gas) iti merkado gapu iti agtultuloy a gubat iti Middle East.
Itay kallabes, impasimudaag ni Marcos ti posibilidad nga agkiddaw iti emergency power manipud iti Kongreso tapno makissayan ti fuel excise tax no agpaut ti riribuk iti Middle East.
Kinuna ni Senate Majority Leader Juan Miguel Zubiri idi Marso 3 a masapul nga ibilang dagiti mammanday-linteg ti kiddaw kas maysa wagas a pangsalaknib kadagiti agus-usar iti lana, nangruna dagiti agbibiahe, mannalon, mangngalap, ken babassit a negosio nga umuna a maapektaran ti ganansiada no ngumina ti gasolina ken krudo.
Segun ken ni Zubiri, sisasagana ti Senado nga agtignay a sipapardas para iti pannakaipaay iti nalawag ken nakedngan a bileg ti Ehekutibo, no la ketdi nalawag dagiti pagaladagan ken panggep daytoy a salakniban dagiti pamilia ken mailisi ti ekonomia iti saan a nasayaat nga epekto ti ingingina ti lana.
Inyebkas met ni Senate President Pro Tempore Panfilo “Ping” Lacson ti panangsuportana iti kiddaw no Marcos iti Kongreso a mangipaay kenkuana iti emergency power tapno agresponde iti ingingina ti lana iti sangalubongan.
18 nga ex-marines, Baligod, kdp., indarum ni Trillanes
Nupay kasta namakdaar ni Senate President Vicente Sotto III iti panagdarasudos a mangipaay iti kastoy a kiddaw, ta masapul nga adalen a naimbag dagiti senador ti singasing ti Malakanyang.
Imballaag met ni Sen. Sherwin Gatchalian, daulo ti Senate Committee on Finance, ti saan a nasayaat nga epekto a patauden ti pannakasuspenso ti excise fuel tax, ta ₱300 a bilion iti tinawen ti mapukaw iti gobierno, ket dakkel a gatad daytoy. (Hannah L. Torregoza/Manila Bulletin//Lito Hilidon/Bannawag)
