Impila ni National Security Adviser Eduardo Año iti Department of Justice (DOJ) idi Marso 4 ti kaso a kriminal kontra kada Mike Defensor, abogado Levito Baligod, ken dagiti 18 a dati a kameng ti Marines.
Naidarumda iti unlawful means of publication and unlawful utterances maibasar iti Revised Penal Code (RPC) mainaig iti Republic Act (RA) 10175, wenno ti Cybercrime Prevention Act, maipuon iti alegasion dagiti 18 a nagpabigbig a dati a kameng ti marines a nangitulodda iti binilion a pisos a kickback dagiti politiko manipud iti flood control project, a pakairamanan ni Año.
"Masapul a salaknibak ti dayawko ken saanko nga ilako ti naganko iti asino man iti ania man a gatad," kuna ni Año.
Ni Baligod ti nangiparang kadagiti 18 a dati a marines iti maysa a press conference.
Kalpasanna, indatag ni Baligod ti apidabit dagiti dati a marines iti Office of the Ombudsman, a nangbaon iti National Bureau of Investigation (NBI) nga agimbestigar.
Panagngato ti plete iti dyip, kdp. a PUV, inanamongan ti LTFRB
Kinuna ni Año nga inramanna ni Defensor iti kaso ta inaklon daytoy a tinulonganna dagiti 18 a dati a marines.
Segun ken ni Año, umuna pay laeng daytoy a kaso, ket addanto pay sumaruno nga ipilana kas iti cyber libel ken perjury kontra kadagiti respondent.
Kinuna ni Año a saan a pudno ti imbaga dagiti 18 a dati a marines a dimmar-ay isuna iti maysa a taripnong kaduana ni dati nga speaker Martin Romualdez, a sadiay ti kunada nga immawatan ni Año iti kuarta. (Jeffrey Damicog/Manila Bulletin//Lito Hilidon/Bannawag)
