Dinagadag ti National Security Council (NSC) ti Kongreso a pardasanda nga anamongan ti baro nga Anti-Espionage Bill, a mangsukat iti Commonwealth Act 616 a naipaulog pay laeng idi panawen dagiti Amerikano, kasta met ti Anti-Foreign Malign Influence and Interference Act.
Segun iti NSC, no maipaulog dagitoy a paglintegan, mapapigsa pay ti legal a pagannurotan kontra iti nalimed ken makaallilaw nga aktibidad a supsuportaran ti ganggannaet a pagilian tapno kumapuy ti seguridad ti pagilian ken demokratiko nga institusion, kalpasan a naparmekda ti bunggoy dagiti espia a buklen dagiti Filipino.
Kuna ti NSC a pasaknapen dagitoy a paglintegan ti karbengan ti gobierno nga agimbestigar, mangilisi ken mangsinga kadagiti operasion ken bunggoy ti kabusor, ken tapno masalakniban ti sensitibo nga impormasion ken napateg nga impraestruktura ti pagilian.
Saanen nga inlawlawag ti NSC ti mainaig iti panangparmekda iti panagespia a ponduan ti sabali a pagilian nga usarenda ti Filipino nga agtrabaho wenno addaan pakainaiganna nga ahensia a para iti depensa ken seguridad ti Filipinas, agraman dagiti kinasiasinoda, wagas, wenno panawen tapno saan a maikompromiso ti operasionda.
Ngem kuna ti NSC nga inaklon dagiti Filipino ti pannakairamanda iti panagespia ken makitintinnulongda kadagiti autoridad.
Panagwaras ti fake news iti pannakabista ti kaso nga impeachment ni Duterte, impakdaar ni Rep. Adiong
Innayon ti NSC a ti pannakaarestar dagiti Filipino nga ages-espia para iti China ket resulta ti nagtipon nga operasion ti nadumaduma nga ahensia ti gobierno iti sidong ti Insider Threat Program.
Iti met biang ti Armed Forces of the Philippines (AFP), suportaranda dagiti isaysayangkat ti gobierno a mangsalaknib iti seguridad ti pagilian, agraman ti panagdur-as dagiti legal a pagannurotan ken institusion, tapno masaranget dagiti rummuar a pangta kalpasan ti pannakaparmek dagiti bunggoy ti espia iti pagilian.
Segun ken ni panakangiwat ti AFP Col. Francel Margareth Padilla, daytoy ti pakakitaan nga umad-adun ti espia nga agusar iti internet ken teknolohia, isu a napatpateg itan ti naan-anay a panagridam ken panagtitinnulong dagiti ahensia ti gobierno. (Aaron Recuenco/Manila Bulletin//Lito Hilidon/Bannawag)
