Awaten latta ti House Committee on Justice, a mangtaming iti kaso nga impeachment a maibusor ken ni Bise Presidente Sara Duterte, ti testimonia ti maysa a testigo a ni Ramil Madriaga apaman nga iparang dagiti complainant daytoy, iti laksid ti panangidarum kenkuana ni Duterte.
Daytoy ti imbatad ni Batangas 2nd district Rep. Gerville Luistro, daulo ti Committee on Justice ti Kamara, iti maysa nga interbiu.
Inlawlawag ni Luistro a sabali a banag ti pannakaidarum ni Madriaga iti kaso a perjury, iti kaso nga impeachment kontra ken ni Duterte.
Nadakamat ti apidabit ni Madriaga iti impeachment complaint a naipila konra ken ni Duterte ita a tawen, ket dua kadagitoy ti naideklarar a kas "sufficient in form and substance," idi Marso 4, a nangitunda iti sumaruno a paset ti proseso ti impeachment nga isu ti panangsungbat ni Duterte kadagiti kasona.
Ti perjury ti basol a panagulbod iti korte iti laksid ti panagsapata ti testigo a sawenna laeng ti pudno.
Pannakairaman ti China kadagiti nagespia iti Filipinas, inlibak ti Embahada ti China
Ni Madriaga, a nadakamat iti impeachment complaint a maysa kadagiti maipagarup a bag man ti bise presidente, ket nakaditenar ita iti pasilidad ti BJMP gapu iti sabali pay a kasona.
Naidatag ti apidabit ni Madriaga kas pasaet ti impeachment complaint, ket maibilang a kas baro nga ebidensia, gapu ta saan a nairaman daytoy iti immuna a kaso nga impeachment ni Duterte idi 2025.
Segun iti apidabit ni Madriaga, nagpaay daytoy a kas mangibabaet iti maipagarup a panangtaming ken pannakayakar ti confidential ken intelligence fund a nailatang iti Office of the Vice President (OVP) ken iti Department of Education (DepEd) idi nagakem ni Duterte a kas sekretario daytoy.
Imbinsabinsa ni Madriaga no kasano a mairuar wenno mayakar dagiti pondo, ti nagan dagiti maipagarup a nairaraman, ken dagit dokumento a mangpaneknek a dagiti naaramid a transaksion ket ammo wenno pinalubosan ti bise presidente.
Kinuna pay ni Madriaga iti apidabitna a pinonduan dagiti operator ti Philippine Offshore and Gaming Operators (POGO) ken drug dealer dagiti pondo nga inusar ni Duterte iti panagkampaniana idi eleksion 2022. (Ellson Quismorio/Manila Bulletin//Lito Hilidon/Bannawag)
