Mabalin a kiddawen ti House Committee on Justice ti kopia dagiti bank record ken panagparang dagiti kangrunaan a testigo bayat ti panangtamingda iti kaso nga impeachment a maibusor ken ni Bise Presidente Sara Duterte.
Daytoy ti kinuna ni daulo ti Committee on Justice Batangas 2nd district Rep. Gerville Luistro iti maysa nga interbiu iti radio idi Marso 5.
Segun ken ni Luistro, saan a sakup ti Bank Secrecy Law ti proseso ti impeachment ti Kamara, ken adda karbengan ti komite a mangipaulog iti makunkuna a subpoena duces tecum, wenno panagkiddaw iti kopia dagiti dokumento -- agraman dagiti bank record -- ken mangtignay kadagiti testigo nga agtestimoniar kadagiti maangay a bista.
Inlawlawag ni Luistro a saanda nga ekspektaren a mairaman a dagus dagiti bank record ni Duterte kadagiti ebidensia dagiti nangipila iti impeachment compliant, ta iparit daytoy ti Bank Secrecy Law, idinto a ti laeng kaso nga impeachment ti mabalin a pamuspusan tapno maluktan dagiti dokumento iti banko a saan a malabsing ti Bank Secrecy Law.
Kinuna ni Luistro nga addan iti maikatlo nga addang ti impeachment kalpasan a naipaay ti Notice to Respond ken ni Duterte ket nabilin a sungbatanna dagiti alegasion iti las-ud ti 10 nga aldaw. (Ellson Quismorio/Manila Bulletin//Lito Hilidon/Bannawag)
