Inanamongan ti Appeals Chamber ti International Criminal Court (ICC) ti immuna a pangngeddeng nga agtalinaed ni dati a presidente Rodrigo Duterte a nakaditenar iti The Hague, The Netherlands.
Iti pangngeddeng ti Appeals Chamber idi Marso 6, pinatalgedanda ti desision ti Pre-Trial Chamber I (PTC 1) nga awan ti baro wenno nabaliwan a pasamak a mangikalintegan iti temporario a pannakawayawaya ni Duterte kabayatan ti panagtulid ti kasona.
Maibasar iti apelar ti depensa, inkalinteganda a nagbiddut ti PTC 1 iti panangilaksidda iti medical report nga indatag dagiti abogado ni Duterte mainaig iti kasasaad ti salun-atna.
Ngem inkeddeng ti Appeals Chamber nga awan ti baro impaay ti depensa a baro nga impormasion idinto a saan met nga ineksamen dagiti nasao a medical practitioner ni Duterte.
Segun kadagiti hues, nagpannuray laeng ti report ti depensa iti nairuar a resulta ti panangtingiting dagiti medical expert a dinutokan ti ICC, isu a saan a maibilang a baro nga impormasion daytoy.
Panagngato ti plete iti dyip, kdp. a PUV, inanamongan ti LTFRB
Impaganetget ti Appeals Chamber a nupay makatulong ti medikal nga impormasion iti panangtingiting iti salun-at ni Duterte, agtalinaed iti korte ti legal a karbengan a mangikeddeng no agpayso nga adda pagpeggadan -- kas iti panaglibas, pannakibiang iti imbestigasion, wenno panagtultuloy nga agaramid iti krimen.
Gapu iti daytoy, inlaksid ti Appeals Chamber amin nga argumento ti depensa ket pinatalgedanda ti desision ti PTC 1 nga agtalianed ni Duterte iti sidong ti ICC. (Argyll Cyrus Geducos/Manila Bulletin//Lito Hilidon/Bannawag)
