Kaso a perjury ti impila ni Mamamayang Liberal (ML) Party-List Rep. Leila De Lima ita nga aldaw, Marso 9, kontra iti 18 a dati a kameng ti marines a nagkuna a nangitulodda iti binilion a pisos ti gatadna a kuarta kadagiti nadumaduma a mammanday-linteg a ken opisial ti gobierno kas kickback-da manipud iti flood control project.
Kinagiddanna a nangipila iti kaso a perjury ni human rights activist Fr. Flavie Villanueva iti Department of Justice (DOJ).
Sakbay daytoy, dimmatag pay da De Lima ken Villanueva iti National Bureau of Investigation (NBI) a nangipila iti kaso a libel ken cyber libel a maibusor kadagiti 8 nga ex-marines ken ti abogadoda a ni Levito Baligod.
Segun ken ni De Lima, saan a pudno ti apidabit a sinapataan dagiti 18 nga ex-marines, ta panggep dagitoy ng allilawen dagiti tao ken dadaelen ti naganna isu nga indarumna ida iti perjury.
Iti apidabit dagiti 18 nga ex-marines, kinunada nga immawat ni De Lima iti ₱30 a milion agingga iti ₱70 a milion kalpasan a nakipatang ken ni dati a kongresman Elizaldy Co ken dati nga speaker Martin Romualdez.
Panagngato ti plete iti dyip, kdp. a PUV, inanamongan ti LTFRB
Iti sabali a bangir, kinuna ni Villanueva a panggep dagiti 18 nga ex-marines a dadaelen ti kredibilidad dagiti Filipino a testigo iti International Criminal Court (ICC) a nakaidaruman ni dati a presidente Rodrigo Duterte iti kaso a crimes against humanity.
Kuna ni Villanueva a kayat dagiti 18 nga ex-marines a pagparangen a napasuksokan dagiti Filipino a testigo.
Idi Marso 5, indarum ni dati a senador Antonio Trillanes IV dagiti 18 nga ex-marines iti perjury iti DOJ gapu iti testimoniada a nakaala isuna iti $2 a milion nga impasuksokna kadagiti imbestigador ti ICC mainaig iti kaso ni Duterte iti ICC. (Jeffrey Damicog/Manila Bulletin//Lito Hilidon/Bannawag)
